ଜଳେଶ୍ୱର (ସମୃଦ୍ଧ ଓଡିଶା) ପ୍ରତିବର୍ଷ ସିମିଳିପାଳ ଅଞ୍ଚଳରୁ ବହୁ ସଂଖ୍ୟାରେ ହାତୀ ଆସି ବାଲେଶ୍ୱର ଜିଲାର ଜଳେଶ୍ୱର ବ୍ଲକ ଅନ୍ତର୍ଗତ ରାଇବଣିଆ ଥାନା ଇଲାକାରେ ବ୍ୟାପକ କ୍ଷତି ଘଟାଉଥିବାରୁ ରାସଗୋବିନ୍ଦପୁର ଓ ରାଇବଣିଆ ସୀମାରେ ହାତୀ ନ ଆସିବା ପାଇଁ ଏକ ଟ୍ରେଞ୍ଚ ଖନନ ପାଇଁ ସ୍ଥିର କରାଯାଇଛି । ସୂଚନା ଅନୁଯାୟୀ ମଙ୍ଗଳବାର ଜିଲାପାଳ ଘଟଣାସ୍ଥଳକୁ ଯାଇ ମନୋରେଗା ଯୋଜନାରେ ରାଇବଣିଆର ଗରିବ ପ୍ରବାସୀଙ୍କୁ କାର୍ଯ୍ୟ ଯୋଗାଇବା ଉଦ୍ଦେଶ୍ୟରେ ଏପରି ଏକ ପ୍ରକଳ୍ପ ହାତକୁ ନିଆଯାଇଥିବା ଜଣାଯାଇଛି । ଜଳେଶ୍ୱର ବ୍ଲକ ଅନ୍ତର୍ଗତ ରାଇବଣିଆ ଥାନାର ଶ୍ୟାମନଗର, ସର୍ଦ୍ଦାରବନ୍ଧ, ଖୁଆଡ, ବରଡିଆ, କଳମା ଓଲମରା, ରାଇବଣିଆ ଓ କାଳିକ ପଂଚାୟତ ବିଭିନ୍ନ ଗ୍ରାମାଞ୍ଚଳକୁ ହାତୀ ଆସି ବ୍ୟାପକ କ୍ଷତି ଘଟାଇଥାଏ । ପଶ୍ଚିମବଙ୍ଗର ଦଲମା, ଓଡିଶାର ଶିମିଳିପାଳ ଓ ଝାଡଖଣ୍ଡି ଆତୀ ଆସି ଏହି ଅଞ୍ଚଳରେ ବହୁ ଘର ଭାଙ୍ଗିବା ସହିତ ରବି ଓ ଖରିପ ଚାଷର ବ୍ୟାପକ କ୍ଷତି ଘଟାଇ ଆସୁଛି । ଚଳିତବର୍ଷ ବର୍ଷ ତମାମ ହାତୀ ଉପଦ୍ରବ ଯୋଗୁଁ ରାଇବଣିଆର ଜଣେ ଲୋକ ମୃତ୍ୟୁବରଣ କରିବା, ୧୦ଟି ଗୃହପାଳିତ ପଶୁ ମରିବା ଏବଂ ପ୍ରାୟ ୧୧୦ଟି ଘର ଭାଙ୍ଗିଥିବାରୁ ସେ ଅଞ୍ଚଳରେ ଆତଙ୍କ ସୃଷ୍ଟି ହୋଇଛି । ତେଣୁ ଶ୍ୟାମନଗର ପଞ୍ଚାୟତ ନିକଟରେ ଜଙ୍ଗଲ ବିଭାଗ ପକ୍ଷରୁ ୨କିମି ଲମ୍ବର ଏକ ଟ୍ରେଞ୍ଜ କାର୍ଯ୍ୟ ସରିଛି । ଚଳିତବର୍ଷ ଶ୍ୟାମନଗର ପଞ୍ଚାୟତର କେନ୍ଦୁଖୁଣ୍ଟା ଗାଁଠାରେ ୫କି.ମି ଲମ୍ବର ଏକ ଟ୍ରେଞ୍ଚ ଜଳେଶ୍ୱର ବ୍ଲକ ପକ୍ଷରୁ ଏମ୍ଜିଏନ୍ଆରଜିଏସ୍ ଯୋଜନା ମାଧ୍ୟମରେ ଖୋଳିବାର ଲକ୍ଷ୍ୟ ନେଇ ଏବେ ୨ କିମି.ର କାର୍ଯ୍ୟ ଆରମ୍ଭ ପାଇଁ ପଦକ୍ଷେପ ନିଆଯାଇଛି । ନିକଟରେ କାର୍ଯ୍ୟ ହେବାକୁ ଥିବାରୁ ଆଜି ଜିଲାପାଳ କେ ସୁଦର୍ଶନ ଚକ୍ରବର୍ତ୍ତୀ, ଜଳେଶ୍ୱର ବିଡିଓ ଦିପ୍ତିରଂଜନ ସେଠୀ ଓ ଅନ୍ୟ କେତେକ ପଦସ୍ଥ କର୍ମକର୍ତ୍ତା ଘଟଣା ସ୍ଥଳକୁ ଯାଇ ପରିସ୍ଥିତି ଅନୁଧ୍ୟାନ କରିଛନ୍ତି ।
ରିପୋର୍ଟ : ଭୂପତି କୁମାର ପରିଡା