ଛତ୍ରପୁର (ସମୃଦ୍ଧ ଓଡିଶା) କରୋନା ଭୁତାଣୁ ସଂକ୍ରମଣକୁ ରୋକିବା ପାଇଁ ଗଞ୍ଜାମ ଜିଲ୍ଲା ପ୍ରଶାସନ ପକ୍ଷରୁ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେଙ୍କ ନିର୍ଦ୍ଦେଶ କ୍ରମେ ଗତକାଲି ଠାରୁ ଘରକୁ ଘର ବୁଲି ସ୍ୱାସ୍ଥ୍ୟ ପରୀକ୍ଷା କାର୍ଯ୍ୟକ୍ରମ ଆରମ୍ଭ ହୋଇଯାଇଛି । ଏହି କାର୍ଯ୍ୟକ୍ରମ ଜିଲ୍ଲାର ହିଞ୍ଜିଳି ବ୍ଲକର ପ୍ରଥମେ ସାରୁ ଗ୍ରାମରୁ ଜିଲ୍ଲାପାଳଙ୍କ ଉପସ୍ଥିତିରେ ଘରକୁ ଘର ବୁଲି ସ୍ୱାସ୍ଥ୍ୟ ପରୀକ୍ଷା ଆରମ୍ଭ କରାଯାଇଛି । କରୋନା ଭୁତାଣୁ ସଂକ୍ରମଣକୁ ପ୍ରତିହତ କରିବା ପାଇଁ ପ୍ରଶାସନିକ ଅଧିକାରୀ ଓ କର୍ମଚାରୀମାନେ ଲୋକଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିବା ସହ ସେହିମାନଙ୍କ ଟ୍ରାଭେଲ ହିଷ୍ଟ୍ରୀ ସମ୍ପର୍କରେ ସଂଗ୍ରହ କରିବାକୁ ନିର୍ଦ୍ଦେଶ ଦିଆଯାଇଛି । ଏହି କ୍ରମରେ ଜିଲ୍ଲାରେ ଅଙ୍ଗନୱାଡି କର୍ମୀ, ହେଲପର ଓ ଶିକ୍ଷକ ମାନଙ୍କୁ ନେଇ ଟିମ ଗଠିତ କରାଯାଇଛି । ଏହି ଟିମ ଘରକୁ ଘର ବୁଲି ପରିବାର ବର୍ଗର ସ୍ୱାସ୍ଥ୍ୟଗତରୁ ଆରମ୍ଭ କରି ବିଭିନ୍ନ ଆବଶ୍ୟକୀୟ ଅନୁଯାୟୀ ତଥ୍ୟ ସଂଗ୍ରହ କରିଛନ୍ତି । ଏହା ସହିତ କରୋନା ଭୁତାଣୁ ଲକ୍ଷଣ ଅନୁସାରେ ପରିବାରର ଯେଉଁ ବ୍ୟକ୍ତିଙ୍କୁ ଜର, କାଶ, ନିଶ୍ୱାସ ରୁଦ୍ଧ ହୋଇଥିବ, ସେମାନଙ୍କ ତଥ୍ୟ ସଂଗ୍ରହ କରି ସ୍ୱାସ୍ଥ୍ୟ କର୍ମଚାରୀମାନଙ୍କୁ ତଥ୍ୟ ପ୍ରଦାନ କରାଯାଉଛି । ଯଦି ଯେଉଁ ଅଞ୍ଚଳରେ ଏପରି ଲକ୍ଷଣରେ ଥିବା ବ୍ୟକ୍ତିମାନେ ଚିହ୍ନଟ ହୁଅନ୍ତି, ସେମାନଙ୍କ ନିକଟକୁ ସ୍ୱାସ୍ଥ୍ୟ ଟିମ ପହଞ୍ଚି ବିଭିନ୍ନ ପରୀକ୍ଷା ଓ ସ୍କ୍ରିନିଂ କରାଯାଇ ଯଦି କରୋନା ଆକ୍ରାନ୍ତ ଭଳି ସନ୍ଦେହ ଉପୁଜିବ ସେମାନଙ୍କ ରକ୍ତ ନମୁନା କରୋନା ଟେଷ୍ଟ ପାଇଁ ପଠାଯିବ ବୋଲି ଜିଲ୍ଲାପାଳ ଏକ ଭିଡିଓ ବାର୍ତ୍ତା ମାଧ୍ୟମରେ ସୂଚନା ଦେଇଛନ୍ତି । ଏହାସହ ଜିଲ୍ଲାର ସମସ୍ତ ଲୋକଙ୍କୁ ଅନୁରୋଧ କରିଛନ୍ତି ଯେ ସ୍ୱାସ୍ଥ୍ୟ ଯାଞ୍ଚ କରୁଥିବା ଟିମଙ୍କୁ ସମସ୍ତେ ସତ କଥା କହିବାକୁ ସେ ଅନୁରୋଧ କରିଥିଲେ । ଏହାସହ କରୋନା ଭୁତାଣୁ ମହାମାରୀ କିପରି ଜିଲ୍ଲାରୁ ଦୁରେଇ ରହିବ ସେଥି ନିମନ୍ତେ ମାକ୍ସ ପିନ୍ଧିବା ନିହାତି ଜରୁରୀ ବୋଲି ସେ କହିଥିଲେ । କରୋନାର ମୁଖ୍ୟ ଦ୍ୱାର ନାକ ଓ ପାଟି । ଏଥିପାଇଁ ଆମେ ଏହାକୁ ସତର୍କତାର ସହ ଅବଲମ୍ବନ କରି ସମସ୍ତେ ସମଧୁରତା ରହିବ ସହିତ ଘରେ ରହି ନିଜେ ସୁରକ୍ଷିତ ରହିବ ସହିତ ଅନ୍ୟମାନଙ୍କୁ ସୁରକ୍ଷିତ ରଖିବା ଉପରେ ଜିଲ୍ଲାପାଳ ମଧ୍ୟ ଏହି ବାର୍ତ୍ତାରେ ସୂଚନା ଦେଇଛନ୍ତି । ଏନେଇ ଗଞ୍ଜାମ ଜିଲ୍ଲା ସଦର ମହକୁମା ଛତ୍ରପୁର ବ୍ଲକର ୨୩୯ ଗୋଟି ଟିମ ଗଠନ କରାଯାଇ ବ୍ଲକର ସମସ୍ତ ଗାଁକୁ ପହଂଚି ଘରକୁ ଘର ବୁଲି ସ୍ୱାସ୍ଥ୍ୟ ସମ୍ପର୍କିତ ଯାଞ୍ଚ କାର୍ଯ୍ୟକ୍ରମ ଗତକାଲି ଠାରୁ ଆରମ୍ଭ କରାଯାଇଛି । କଣମଣା ପଞ୍ଚାୟତର କଣମଣା ଗ୍ରାମଠାରେ ଅଙ୍ଗନୱାଡି କର୍ମୀ ବାସନ୍ତୀ ସାହୁ, ହେଲପର ତୁଳସୀ ସାହୁ ଓ କଣମଣା ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଅଜିତ କୁମାର ସେଠି ଗାଁର ଘରକୁ ଘର ବୁଲି ସ୍ୱାସ୍ଥ୍ୟ ଯାଞ୍ଚ କାର୍ଯ୍ୟକ୍ରମରେ ଅଂଶ ଗ୍ରହଣ କରି କରୋନରୁ କିପରି ଦୁରେଇ ରହିବ ଏଥି ନିମନ୍ତେ ସଚେତନ କରାଇଥିଲେ । ସେହିପରି ଛତ୍ରପୁର ଏନଏସିର ୧୪ଟି ୱାର୍ଡରେ ଏହି ଟିମ ଘରକୁ ଘର ବୁଲି ଲୋକଙ୍କ ସ୍ୱାସ୍ଥ୍ୟ ଯାଞ୍ଚ କରିଛନ୍ତି ।
ରିପୋର୍ଟ : ଜିଲ୍ଲା ପ୍ରତିନିଧି ନିମାଇଁ ଚରଣ ପଣ୍ଡା
