ଜଳେଶ୍ୱର (ସମୃଦ୍ଧ ଓଡିଶା) ଜଳେଶ୍ୱରରୁ ଦାନ୍ତୁନ ଯିବାଲାଗି ପୁରୁଣା ଓଟିରୋଡର ଦୁରାବସ୍ଥା ଅବର୍ଣ୍ଣନୀୟ ଥିବାରୁ ଗତ ୪ବର୍ଷ ତଳେ ଏହାର ନବିକରଣ ଲାଗି ୨ଟି ପର୍ଯ୍ୟାୟରେ ୧୦ କୋଟି ଟଙ୍କା ଅନୁଦାନ ମିଳିଥିଲା । ଏହାର ୨ୟ ପର୍ଯ୍ୟାୟ କାର୍ଯ୍ୟ ଜଳେଶ୍ୱର ପୁରୁଣିଆ ବଜାର ବାସନ୍ତି ପଡିଆଠାରୁ ଅନୁକୂଳ ଚନ୍ଦ୍ର ମନ୍ଦିର ପର୍ଯ୍ୟନ୍ତ ରାସ୍ତା ନବୀକରଣ କାର୍ଯ୍ୟର ଠିକା ଦିଆଯାଇଥିଲା । ଇତି ମଧ୍ୟରେ ୪ ବର୍ଷ ଅନିବାହିତ ହେଲାଣି, କିନ୍ତୁ ଅଧାପନ୍ଥରିଆ ହୋଇ ପଡି ରହିଛି ରାସ୍ତାକାର୍ଯ୍ୟ । ଜଳେଶ୍ୱରରୁ ପଶ୍ଚିମବଙ୍ଗ ସୀମା ପର୍ଯ୍ୟନ୍ତ ୪ କି.ମି ରାସ୍ତାର ମରାମତି ଓ ନବିକରଣ ଲାଗି ୧୦ କୋଟି ଟଙ୍କା ମିଳିଥିଲା । ଏହାର ପ୍ରଥମ ପର୍ଯ୍ୟାୟ କାର୍ଯ୍ୟ ଶେଷ ହୋଇଥିବା ବେଳେ ୨ୟ ପର୍ଯ୍ୟାୟ କାର୍ଯ୍ୟ ବାସନ୍ତୀ ପଡିଆରୁ-ଅନୁକୂଳ ମନ୍ଦିର ପର୍ଯ୍ୟନ୍ତ ରାସ୍ତାକୁ ୨ ବର୍ଷ ବିଳମ୍ବରେ କାର୍ଯ୍ୟ ଆରମ୍ଭ କରିଥିଲା । ରାସ୍ତାର ପ୍ରସସ୍ତିକରଣ ଲାଗି ଗୁରୁତ୍ୱ ଦିଆଯାଇଥିବା ବେଳେ ତାହା ହୋଇନଥିବାରୁ ବାରମ୍ବାର ଦୁର୍ଘଟଣା ଘଟୁଛି । ଏହି ରାସ୍ତାରେ ଜଳେଶ୍ୱର ବ୍ଳକର ୪ଟି ପଞ୍ଚାୟତ ସହିତ ଦାନ୍ତୁନ ଅଞ୍ଚଳକୁ ଯାତାୟାତ କରାଯାଇଥାଏ । ଏହି ଆନ୍ତରାଜ୍ୟ ରାଜପଥରେ ବହୁ ଓଜନିଆ ଗାଡି ଓ ଯାତ୍ରୀବାହି ବସ୍ ଚଳାଚଳ କରୁଥିବାରୁ ଦୁରାବସ୍ଥା ବଢିବଢି ଚାଲୁଛି । ବ୍ଳକ ଛକ ନିକଟରେ ଏକ ବଡ ଗର୍ତ୍ତ ସୃଷ୍ଟି ହୋଇଥିବାରୁ ଯେ କୌଣସି ବଡ ଦୁର୍ଘଟଣାକୁ ଏଡାଇ ଯାଇନପାରେ । ପୁଣି ରାସ୍ତାକଡରେ କନ୍ଭେଣ୍ଟ ସ୍କୁଲ, ଶ୍ରୀମାଶ୍ରୀଅରବିନ୍ଦ ସ୍କୁଲ, ବ୍ଳକ କାର୍ଯ୍ୟାଳୟ, ପବ୍ଲକି ସ୍କୁଲ, ୨ଟି +୨ ବିଜ୍ଞାନ ମହାବିଦ୍ୟାଳୟ, ସବ୍ଜେଲ୍, ପ୍ରାଣିଚିକିତ୍ସାକେନ୍ଦ୍ର, କୃଷି ଓ ଉଦ୍ୟାନ ବିଭାଗ କାର୍ଯ୍ୟାଳୟ, ବନବିଭାଗ ଓ ଦମକଳ କେନ୍ଦ୍ର, ଉପ ଆରକ୍ଷୀ ଓ ଜନସ୍ୱାସ୍ଥ୍ୟ କାର୍ଯ୍ୟଳୟ ଥିବାରୁ ଏହି ରାସ୍ତାରେ ବହୁଳ ସମାଗମ ହୋଇଥାଏ । ତେଣୁ ଅଧାପନ୍ଥରିଆ ହୋଇ ରହିଥିବା ରାସ୍ତାକାର୍ଯ୍ୟକୁ ଶେଷ କରିବାକୁ ସାଧାରଣରେ ଦାବି ହେଉଛି ।
ରିପୋର୍ଟ : ଭୂପତି ପରିଡା