ଭୁବନେଶ୍ୱର(ସମୃଦ୍ଧଓଡିଶା) ମହିଳା ସଶକ୍ତିକରଣ ଦିଗରେ ଓଡ଼ିଶାର ମହିଳା ସ୍ୱୟଂ ସହାୟକ ଗୋଷ୍ଠୀ ଯେପରି ଦେଶର ମଡେଲ ଭାବରେ ପରିଗଣିତ ହେଉଛି, ଠିକ୍ ସେହିପରି କୃଷି କ୍ଷେତ୍ରରେ କୃଷକ ଉତ୍ପାଦକ ଗୋଷ୍ଠୀ ମାଧ୍ୟମରେ କୃଷକଙ୍କୁ ସଶକ୍ତ କରିବାର ସବୁ ପ୍ରକାର ଅନୁକୂଳ ପରିବେଶ ରହିଛି । କୃଷିରେ ରୂପାନ୍ତରଣ ଆଣିବା ଦିଗରେ କୃଷକ ଉତ୍ପାଦକ ଗୋଷ୍ଠୀ ଏକ ବଳିଷ୍ଠ ମାଧ୍ୟମ । ରାଜ୍ୟ ସରକାରଙ୍କ ପକ୍ଷରୁ କୃଷକ ଉତ୍ପାଦକ ଗୋଷ୍ଠୀଙ୍କୁ ସମସ୍ତ ସୁଯୋଗ ଓ ସୁବିଧା ଯୋଗାଇଦେବା ଲକ୍ଷ୍ୟରେ ମୁଖ୍ୟମନ୍ତ୍ରୀଙ୍କ ଦ୍ୱାରା ୨୦୨୨ ମଇ ୩ ତାରିଖରେ ଏକ ମାର୍ଗଦର୍ଶିକା ଜାରି କରାଯାଇଥିଲା । କୃଷକ ଉତ୍ପାଦକ ଗୋଷ୍ଠୀଙ୍କୁ ପ୍ରୋତ୍ସାହିତ ଓ ସୁଦୃଢ଼ କରିବା ଉଦ୍ଦେଶ୍ୟରେ ୨୦୨୦ରୁ ୨୦୨୩ ଆର୍ଥିକ ବର୍ଷ ମଧ୍ୟରେ ରାଜ୍ୟ ସରକାରଙ୍କ ପକ୍ଷରୁ ବିିଭନ୍ନ ଯୋଜନାରେ ସମ୍ମିଳିତ ଭାବରେ ୧୦୦୦ କୋଟି ଟଙ୍କାରୁ ଊଦ୍ଧ୍ୱର୍ ବ୍ୟୟ ବରାଦ କରାଯାଇଛି । ଏହା ଦ୍ୱାରା ଉତ୍ପାଦକ ଗୋଷ୍ଠୀର ପ୍ରାୟ ୩ ଲକ୍ଷରୁ ଊଦ୍ଧ୍ୱର୍ ଚାଷୀ ଉପକୃତ ହୋଇଛନ୍ତି ବୋଲି କୃଷି ଓ କୃଷକ ସଶକ୍ତିକରଣ, ମତ୍ସ୍ୟ ଓ ପ୍ରାଣୀସଂପଦ ବିକାଶ ମନ୍ତ୍ରୀ ଶ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ କହିଛନ୍ତି । ଆଜି ଓୟୁଏଟି ପରିସରରେ କୃଷି ଓ କୃଷକ ସଶକ୍ତିକରଣ ବିଭାଗ ଅନ୍ତର୍ଗତ ଉଦ୍ୟାନ କୃଷି ନିର୍ଦ୍ଦେଶାଳୟ ଓ ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ ସହାୟତାରେ ଆୟୋଜିତ ଓଡ଼ିଶା ୨୦୨୪ ଏଫ୍ପିଓ କନ୍କ୍ଲେଭ୍ ଉଦ୍ଘାଟନ କରି ମନ୍ତ୍ରୀ ଶ୍ରୀ ସ୍ୱାଇଁ କହିଛନ୍ତି ଯେ କୃଷକ ଉତ୍ପାଦକ ଗୋଷ୍ଠୀ ଗ୍ରାମୀଣ ଅର୍ଥନୀତିର ବିକାଶ ଦିଗରେ ଏକ ଘଟକ ଭାବରେ କାର୍ଯ୍ୟ କରୁଛି ଓ ଏହା ଦ୍ୱାରା ଗ୍ରାମାଞ୍ଚଳରେ ଅଧିକ ନିଯୁକ୍ତି ସୃଷ୍ଟି ହେଉଛି । ରାଜ୍ୟ ସରକାରଙ୍କ ଦ୍ୱାରା କୃଷକ ଉତ୍ପାଦକ ଗୋଷ୍ଠୀ ନୀତି ଘୋଷଣା ହେବା ଦିନଠାରୁ ଏଫ୍ପିଓ ଆନ୍ଦୋଳନକୁ ଶକ୍ତିଶାଳୀ କରି ଗଢ଼ିତୋଳିବା ପାଇଁ କୃଷି ବିଭାଗ ପକ୍ଷରୁ ଅନେକଗୁଡ଼ିଏ ଫଳପ୍ରଦ ପଦକ୍ଷେପ ନିଆଯାଇଛି । ରାଜ୍ୟରେ ମୋଟ କୃଷକ ପରିବାର ମଧ୍ୟରୁ ୯୨ ପ୍ରତିଶତରୁ ଊଦ୍ଧ୍ୱର୍ କ୍ଷୁଦ୍ର ଓ ନାମମାତ୍ର ଚାଷୀ ହୋଇଥିବାରୁ କୃଷକ ଉତ୍ପାଦକ ଗୋଷ୍ଠୀ ଗଠନ ମାଧ୍ୟମରେ କୃଷକମାନଙ୍କୁ ଏକାଠି କରି ସେମାନଙ୍କର ଦକ୍ଷତା, କ୍ଷମତା ଓ ବଜାରରେ ସେମାନଙ୍କ ମୂଲଚାଲ କରିବା ଶକ୍ତିକୁ ବୃଦ୍ଧି କରିଥାଏ ବୋଲି ମନ୍ତ୍ରୀ ଶ୍ରୀ ସ୍ୱାଇଁ କହିଛନ୍ତି । ମନ୍ତ୍ରୀ ଶ୍ରୀ ସ୍ୱାଇଁ ପୁଣି କହିଛନ୍ତି ଯେ ରାଜ୍ୟ ସରକାରଙ୍କ କୃଷି ଓ କୃଷକଙ୍କ ବିକାଶ ନିମନ୍ତେ ପ୍ରତିବଦ୍ଧତାର ନିଦର୍ଶନ ସ୍ୱରୂପ ଚଳିତ ବର୍ଷ କୃଷି ବଜେଟ ଗତବର୍ଷ ତୁଳନାରେ ପ୍ରାୟ ୧୭ ପ୍ରତିଶତ ବୃଦ୍ଧି ପାଇଛି । ସମ୍ମିଳନୀରେ କୃଷି ଓ କୃଷକ ସଶକ୍ତିକରଣ ବିଭାଗର ପ୍ରମୁଖ ଶାସନ ସଚିବ ଡ. ଅରବିନ୍ଦ କୁମାର ପାଢ଼ୀ କହିଲେ ଯେ ରାଜ୍ୟରେ ୨୦୧୮ରୁ କୃଷକ ଉତ୍ପାଦକ ଗୋଷ୍ଠୀ କାର୍ଯ୍ୟକାରୀ ହେଉଛି । କୃଷକ ଉତ୍ପାଦକ ଗୋଷ୍ଠୀଙ୍କୁ ସଶକ୍ତ କରିବା ପାଇଁ ବିଭାଗ ପକ୍ଷରୁ ‘ଏଫ୍ପିଓମାନଙ୍କୁ ସହାୟତା’ ରାଜ୍ୟ ଯୋଜନା ଆରମ୍ଭ କରାଯାଇଛି । ରାଜ୍ୟରେ କରାଯାଉଥିବା ଧାନ ପରବର୍ତ୍ତୀ ଜମିର ପରିଚାଳନା କାର୍ଯ୍ୟକ୍ରମ ଦେଶର ସର୍ବବୃହତ୍ କୃଷି ନବବିନ୍ୟାସ ପଦକ୍ଷେପ ବୋଲି ସେ କହିଥିଲେ । ନାବାର୍ଡର ରିପୋର୍ଟ ଅନୁଯାୟୀ କୃଷକ ଉତ୍ପାଦକ ଗୋଷ୍ଠୀର ବାର୍ଷିକ ରୋଜଗାର ମଧ୍ୟ ୧୩.୪ ପ୍ରତିଶତ ହାରରେ ବୃଦ୍ଧି ପାଉଛି ବୋଲି ଡ. ପାଢ଼ୀ କହିଥିଲେ । ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟର କୁଳପତି ପ୍ରଫେସର ପ୍ରଭାତ କୁମାର ରାଉଳ କହିଲେ ଯେ ସଂପ୍ରତି ରାଜ୍ୟ କୃଷି କ୍ଷେତ୍ରରେ ରୂପାନ୍ତରଣ ଆସିବା ସହିତ କୃଷକମାନଙ୍କର ବିକାଶ ହୋଇଛି । କୃଷି ଓ କୃଷକ ସଶକ୍ତିକରଣ ବିଭାଗ ସହାୟତାରେ ଓୟୁଏଟି ଅଧୀନରେ କୃଷକ ଉତ୍ପାଦକ ଗୋଷ୍ଠୀଙ୍କ ପାଇଁ ଖୋଲାଯାଇଥିବା ଉତ୍କର୍ଷ କେନ୍ଦ୍ର କୃଷକ ଉତ୍ପାଦକ ଗୋଷ୍ଠୀର ଦୃଶ୍ୟପଟରେ ପରିବର୍ତ୍ତନ ଆଣିବା ସହିତ ଏହାକୁ ଅଧିକ କି୍ରୟାଶୀଳ କରିଛି । ଆଜିର କୃଷି ଗୋଷ୍ଠୀଗତ କୃଷିରେ ପରିଣତ ହୋଇଛି । ଏହି ପରିପ୍ରେକ୍ଷୀରେ କୃଷକ ଉତ୍ପାଦକ ଗୋଷ୍ଠୀକୁ ଏକ ଆନ୍ଦୋଳନରେ ପରିଣତ କରିବା ପାଇଁ ସେ କହିଥିଲେ । ସମ୍ମିଳନୀ ପ୍ରାରମ୍ଭରେ ଉଦ୍ୟାନ କୃଷି ନିର୍ଦ୍ଦେଶକ ଶ୍ରୀ ରୋହିତ କୁମାର ଲେଙ୍କା କୃଷକ ଉତ୍ପାଦକ ଗୋଷ୍ଠୀ ଗଠନର ଆଭିମୁଖ୍ୟ ଏବଂ ଏହାର କାର୍ଯ୍ୟଧାରା ଏବଂ ରାଜ୍ୟରେ ଅଦ୍ୟାବଧି ପଞ୍ଜିକୃତ ହୋଇଥିବା ୯୬୨ ଗୋଷ୍ଠୀର କାର୍ଯ୍ୟକ୍ରମ ସଂପର୍କରେ ଆଲୋଚନା କରିଥିଲେ । ସମ୍ମିଳନୀ ଅବସରରେ ରାଜ୍ୟରେ କୃଷକମାନଙ୍କୁ ଆବଶ୍ୟକ ସହାୟତା ଯୋଗାଇଦେବା ଉଦ୍ଦେଶ୍ୟରେ ଆଜି ୩୦ଟି ଏଗ୍ରିବିଜିନେସ୍ କମ୍ପାନି, ଆର୍ଥିକ ଅନୁଷ୍ଠାନ ଏବଂ ଦକ୍ଷତା ବୃଦ୍ଧି ପ୍ରତିଷ୍ଠାନ ସହିତ ବୁଝାମଣା ପତ୍ର ସ୍ୱାକ୍ଷରିତ ହୋଇଥିଲା । ସମ୍ମିଳନୀରେ ମନ୍ତ୍ରୀ ଶ୍ରୀ ସ୍ୱାଇଁ ଓଡ଼ିଶାରେ କୃଷକ ଉତ୍ପାଦକ ଗୋଷ୍ଠୀଙ୍କୁ କାର୍ଯ୍ୟକ୍ଷମ କରାଇବା ଓ ପ୍ରୋତ୍ସାହନ ଯୋଗାଇଦେବା ଉଦ୍ଦେଶ୍ୟରେ ଉଲ୍ଲେଖନୀୟ କାର୍ଯ୍ୟ କରିଥିବାରୁ ନାବାର୍ଡ, ନାଫେଡ୍, ସ୍ମଲ୍ ଫାର୍ମସ ଏଗ୍ରିବିଜ୍ିନେସ୍ କନ୍ସୋରଟିଅମ୍, ଫାଉଣ୍ଡେସନ୍ ଫର୍ ଡେଭଲପ୍ମେଣ୍ଟ ଅଫ୍ ରୁରାଲ୍ ଭ୍ୟାଲୁ ଚେନ୍ ଓ ନ୍ୟାସନାଲ୍ କୋଅପରେଟିଭ୍ ଡେଭ୍ଲପ୍ମେଣ୍ଟ କର୍ପୋରେସନ୍କୁ ସମ୍ବର୍ଦ୍ଧିତ କରିଥିଲେ । ବିଶ୍ୱବିଦ୍ୟାଳୟର ସଂପ୍ରସାରଣ ବିଭାଗର ନିର୍ଦ୍ଦେଶକ ଡ. ପ୍ରସନ୍ନ ଜିତ ମିଶ୍ର ଧନ୍ୟବାଦ ଅର୍ପଣ କରିଥିଲେ । ସମ୍ମିଳନୀର ୩ଟି ବୈଷୟିକ ଅଧିବେଶନରେ ବିଶେଷଜ୍ଞମାନେ କୃଷକ ଉତ୍ପାଦକ ଗୋଷ୍ଠୀର କାର୍ଯ୍ୟଧାରାରେ ଉନ୍ନତି ଓ ବିକାଶର ବିଭିନ୍ନ ଦିଗ ସଂପର୍କରେ ବିସ୍ତୃତ ଭାବରେ ଆଲୋଚନା କରିଥିଲେ । ଏଥିରେ କୃଷି ବୈଜ୍ଞାନିକ, କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ବିଭାଗର ଅଧିକାରୀ, କୃଷି ଉଦ୍ୟୋଗୀ, ୩୦୦ରୁ ଊଦ୍ଧ୍ୱର୍ କୃଷକ ଉତ୍ପାଦକ ଗୋଷ୍ଠୀ ଓ କୃଷି ବାଣିଜି୍ୟକ କମ୍ପାନିର ପ୍ରତିନିଧିଙ୍କ ସମତେ କୃଷି ବାଣିଜ୍ୟ ବିଭାଗର ଛାତ୍ରଛାତ୍ରୀ ଓ ବହୁ କୃଷକ ଯୋଗଦେଇଥିଲେ ।
ରିପୋର୍ଟ : ରଜତ ମହାପାତ୍ର