ପୋଲସରା (ସମୃଦ୍ଧ ଓଡିଶା) ପୋଲସରା ପଞ୍ଚାୟତ ସମିତି ସମ୍ମିଳନୀ କକ୍ଷରେ ଗତକାଲି ଅନୁଷ୍ଠିତ ଏକ ବୈଠକରେ ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ ଯୋଗଦେଇ କହିଛନ୍ତି ଯେ ଗଞ୍ଜାମ ଜିତିବ କରୋନା ହାରିବ । ଗଞ୍ଜାମ ଜିଲ୍ଲାରେ ସ୍ଥିତି ସୁଧୁରି ଆସିଲାଣି । କାରଣ ଏବେ ଆଉ ବାହାରୁ କେହି ଆସୁନାହାନ୍ତି । ତଥାପି ଆମକୁ ସତର୍କ ରହିବାକୁ ପଡିବ ବିଶେଷ କରି କରୋନା ସଂକ୍ରମଣକୁ ରୋକିବା ପାଇଁ ପଞ୍ଚ ସୂତ୍ରୀ ନିୟମକୁ କଡାକଡି ଭାବେ ପାଲନ କରିବାକୁ ପଡିବ ବୋଲି ଶ୍ରୀ କୁଲାଙ୍ଗେ ପରାମର୍ଶ ଦେଇଥିଲେ । ବ୍ୟବସାୟୀମାନେ ଏହି ପଞ୍ଚ ସୂତ୍ର ପାଳନ କରୁଛନ୍ତି କି ନାହିଁ ଦେଖିବାକୁ ପଡିବ । ଦୋକାନ ଆଗରେ ବାରିକେଡ କରିବା, ଗ୍ରାହକମାନଙ୍କ ମଧ୍ୟରେ ଦୁଇ ମିଟର ଦୁରତା ସାମାଜିକ ଦୁରତା ପାଇଁ ଗୋଲେଇ କରିବା, ସେନିଟାଇଜେସନ କରିବା, ବ୍ୟବସାୟୀ ଉଭୟ ମାସ୍କ ଓ ଗ୍ଳୋବ ପିନ୍ଧିବା ଏବଂ ନୂତନ ଗ୍ରାହକମାନଙ୍କର ନାମ ଠିକଣା ଲେଖି ରଖିବା ପାଇଁ ପରାମର୍ଶ ଦେଇଥିଲେ । ଯେଉଁ ବ୍ୟବସାୟୀ ଏହି ନିୟମକୁ ପାଳନ ନ କରିବ ୧୫ ଦିନ ପାଇଁ ଦୋକାନ ବନ୍ଦ କରିଦେଲେ ବାଟକୁ ପଳି ଆସିବ ବୋଲି କୁଲାଙ୍ଗେ ଚେତାବନୀ ଦେଇଥିଲେ । ଏହିପରି କରୋନା ନିୟମକୁ କଡାକଡି ଭାବେ ପାଳନ କଲେ ଗଞ୍ଜାମ ଜିଲ୍ଲାରେ କରୋନା ଆକ୍ରାନ୍ତଙ୍କ ସଂଖ୍ୟା ଶୂନକୁ ଆସିଯିବ ବୋଲି ଜିଲ୍ଲାପାଳ ଆଶା ପ୍ରକାଶ କରିଥିଲେ । ପୋଲସରା ଅଞ୍ଚଳରେ ବର୍ତ୍ତମାନ ମାତ୍ର ୩୧ଟି ସକ୍ରିୟ ମାମଲା ରହିଥିବା ଏବଂ ସଂକ୍ରମିତମାନଙ୍କ ମଧ୍ୟରୁ ୨୭ ଜଣ ହୋମ କ୍ଵାରେନଣ୍ଟାନରେ ଥିବାବେଳେ ମାତ୍ର ୪ ଜଣ କୋଭିଡ ସେଣ୍ଟର ଥିବାରୁ ଜିଲ୍ଲାପାଳ ଆନନ୍ଦ ପ୍ରକାଶ କରିଛନ୍ତି । କୋଭିଡ ଯୋଦ୍ଧା, ଆଶା ଓ ଅଙ୍ଗନୱାଡି, କର୍ମୀ, ଶିକ୍ଷକ ଶିକ୍ଷୟିତ୍ରୀ ଓ କୋଭିଡ ମନିଟରମାନଙ୍କ ଅକ୍ଲାନ୍ତ ଉଦ୍ୟମ ଯୋଗୁଁ ସମ୍ଭବ ହୋଇଛି ବୋଲି କହିଥିଲେ । ଏହି ବୈଠକରେ ପୋଲସରା ଅଞ୍ଚଳର ନିର୍ବାଚିତ ପ୍ରତିନିଧି ଓ ସରକାରୀ କର୍ମଚାରୀ ଓ ଅଧିକାରୀମାନେ ଅଂଶ ଗ୍ରହଣ କରିଥିଲେ ।
ରିପୋର୍ଟ : ଜିଲ୍ଲା ପ୍ରତିନିଧି ନିମାଇଁ ଚରଣ ପଣ୍ଡା