ଛତ୍ରପୁର (ସମୃଦ୍ଧ ଓଡିଶା) ବିଭିନ୍ନ ମହାବିଦ୍ୟାଳୟ, ବିଶ୍ୱବିଦ୍ୟାଳୟରେ ରାଗିଂ ଯୋଗୁଁ ବହୁ ଛାତ୍ରଛାତ୍ରୀମାନେ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଇଥାନ୍ତି । ଗଞ୍ଜାମ ଜିଲ୍ଲାରେ କୌଣସି ମହାବିଦ୍ୟାଳୟ, ବିଶ୍ୱବିଦ୍ୟାଳୟ କିମ୍ବା ଯାନ୍ତ୍ରିକ ବିଦ୍ୟାଳୟଗୁଡିକରେ ରାଗିଂ ହେଉଥିବା ଜଣାପଡିବ ତୁରନ୍ତ କାର୍ଯ୍ୟାନୁଷ୍ଠାନ ନିଆଯିବ ବୋଲି ବୈଠକରେ ଜିଲ୍ଲାପାଳ ଦିବ୍ୟଜ୍ୟୋତି ପରିଡା ଓ ଗଞ୍ଜାମ ଏସପି ବ୍ରିଜେଶ କୁମାର ରାଏ ସୂଚନା ଦେଇଛନ୍ତି । ଏପରିକି ଜିଲ୍ଲା ପ୍ରଶାସନ ପକ୍ଷରୁ ଏକ ହେଲ୍ପଲାଇନ ନମ୍ବର ମଧ୍ୟ ଜାରି କରାଯିବ । ଯେକୌଣସି ଶିକ୍ଷାନୁଷ୍ଠାନଗୁଡିକରେ ରାଗିଂର ଶିକାର ହେଉଥିବା ଛାତ୍ରଛାତ୍ରୀମାନେ ତୁରନ୍ତ ଏହି ନମ୍ବରରେ ଜଣାଇପାରିବେ । ତୁରନ୍ତ ଜିଲ୍ଲା ପ୍ରଶାସନ ଓ ପୋଲିସ ଏହା ଉପରେ କାର୍ଯ୍ୟନୁଷ୍ଠାନ ନେବେ । ବୈଠକରେ ଜିଲ୍ଲାରେ ଥିବା ମହାବିଦ୍ୟାଳୟ, ନର୍ସିଂ କଲେଜ, ଆଇଟିଆଇ ଓ ଘରୋଇ ବିଦ୍ୟାଳୟର ଅଧ୍ୟକ୍ଷ/ଅଧ୍ୟକ୍ଷାମାନଙ୍କୁ ଜିଲ୍ଲାପାଳ ଆଣ୍ଟି ରାଗିଂ ସ୍କ୍ବାର୍ଡ ଓ ଇଣ୍ଟରନାଲ କମିଟି ଗଠନ ସମ୍ପର୍କରେ ପଚାରି ବୁଝିଥିଲେ । ଯେଉଁଠି ବି ରାଗିଂର ଅଭିଯୋଗ ଆସିବ ତୁରନ୍ତ ଅନୁସନ୍ଧାନ ସମେତ ଏହି ଦିଗରେ ଦୃଷ୍ଟାନ୍ତମୂଳକ କାର୍ଯ୍ୟନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି । ଶିକ୍ଷାନୁଷ୍ଠାନଗୁଡିକରେ ଶୈକ୍ଷିକ ବାତାବରଣ ସମେତ ଛାତ୍ରଛାତ୍ରୀମାନଙ୍କ ମଧ୍ୟରେ ସୌହାର୍ଦ୍ଦ୍ୟପୂର୍ଣ୍ଣ ବାତାବରଣ ପ୍ରତିଷ୍ଠା କରିବା ଉପରେ ଗୁରୁତ୍ବ ଦିଆଯାଇଛି । ଛାତ୍ରାବାସ ଦାୟିତ୍ବରେ ଥିବା ଅଧ୍ୟକ୍ଷ, ୱାର୍ଡନ ଦିନକୁ ଦୁଇ ଥର ଛାତ୍ରବାସ ପରିଦର୍ଶନ କରିବା ଉଚିତ । ଏହାସହ ଜିଲ୍ଲାର ପ୍ରତ୍ୟେକ କଲେଜରେ ଥିବା ଛାତ୍ରନେତାମାନଙ୍କଠାରୁ ସେମାନଙ୍କ ଦ୍ବାରା କୌଣସି ରାଗିଂ କରାଯାଉନଥିବା ନେଇ ଏକ ଅଣ୍ଡରଟେକିଂ ଲେଖା ରଖାଯିବ । ଏହି ବୈଠକରେ ଗଞ୍ଜାମ ଜିଲ୍ଲାପାଳ ଦିବ୍ୟଜ୍ୟୋତି ପରିଡା, ଗଞ୍ଜାମ ଏସପି ବ୍ରିଜେଶ କୁମାର ରାଏ, ଅତିରିକ୍ତ ଜିଲ୍ଲାପାଳ ଲୀନା କୁମାରୀ ଖେସ, ପ୍ରିୟ ରଞ୍ଜନ ପୃଷ୍ଟି ସମେତ ବହୁ କଲେଜର ପ୍ରିନ୍ସପାଲ ସମତେ ବିଭାଗୀୟ ଅଧିକାରୀମାନେ ଉପସ୍ଥିତ ରହିଥିଲେ ।
ରିପୋର୍ଟ : ଜିଲ୍ଲା ପ୍ରତିନିଧି ନିମାଇଁ ଚରଣ ପଣ୍ଡା