ଜଳେଶ୍ୱର (ସମୃଦ୍ଧ ଓଡିଶା) ୨୦୧୯ ବିଧାନସଭା ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ବିଜେପି ନିର୍ବାଚନ ବୈତରଣୀ ପାରି ହେବା ପାଇଁ ବିଭିନ୍ନ ପ୍ରୟାସ ଜାରି ରଖିଥିବା ବେଳେ ରାଜ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ଦଳ ବାଜିମାତ୍ ମାରିଥିଲା । ନିର୍ବାଚନ ସମୟରେ ବିଜେପିର ଲହର ଦୃଢ ଥିବାବେଳେ ଜଳେଶ୍ୱର ବିଜେପିରେ ଗୋଷ୍ଠିକନ୍ଦଳ ଯୋଗୁଁ ନିରାଶ ହେବାକୁ ପଡିଥିଲା । ଏହାକୁ ଦୂର କରିବାଲାଗି ଆଜି ରବିବାର ଜଳେଶ୍ୱର କାଳୀମନ୍ଦିର ପ୍ରାଙ୍ଗଣରେ ବରିଷ୍ଠ ଭାଜପା ନେତା ତଥା ପୂର୍ବତନ ଜିଲା ଉପସଭାପତି ଅରୁଣ ବେଜଙ୍କ ଦ୍ୱାରା ଏକ ସାମ୍ବାଦିକ ସମ୍ମିଳନୀ ଆହୁତ ହୋଇଯାଇଛି । ଗତ ମ୍ୟୁନିସିପାଲଟି, ପଂଚାୟତ ଓ ବିଧାନସଭା ନିର୍ବାଚନରେ ଦଳ ଭଲ ପ୍ରଦର୍ଶନ କରିନଥିବାରୁ କର୍ମୀ ଓ ନେତାମାନେ ସଂଗଠିତ ଭାବେ କାର୍ଯ୍ୟ କରିବାକୁ ଶ୍ରୀ ବେଜ ଆହ୍ୱାନ ଦେଇଥିଲେ । ଏପରିକି ନେତାମାନେ କର୍ମୀ ଓ ସଂଗଠକ ମାନଙ୍କ ନିକଟରେ ବିଶ୍ୱାସଭାଜନ ହେବା ଉଚିତ୍ ବୋଲି କହିଥିଲେ । ସେ ଦଳକୁ ମା ଭଳି ଭଲ ପାଉଥିବାରୁ ଦଳର ଆଭ୍ୟନ୍ତରୀଣ କଥା ବାହାରେ ପ୍ରକାଶ ନ କରି ରାଜ୍ୟ ନେତୃତ୍ୱକୁ ସମ୍ମାନ ଦେବା ଓ ବରିଷ୍ଠ ନେତୃମଣ୍ଡଳୀଙ୍କୁ ସମାଲୋଚନା ନ କରିବାକୁ ସେ ଆହ୍ୱାନ ଦେଇଥିଲେ । ଆଜିର ଏହି ସାମ୍ବାଦିକ ସମ୍ମିଳନୀରେ ପୂର୍ବତନ ମଣ୍ଡଳ ସଭାପତି ପରେଶ ଚନ୍ଦ୍ର ଘୋଷ, ପ୍ରଦୀପ ମହାନ୍ତି, ସୁଶିଲ ପ୍ରଧାନ, ଲକ୍ଷ୍ମିନାରାୟଣ ପ୍ରଧାନ, ଗଦାଧର ସିଂ ଓ ଗଣେଶ ମାଈତି ପ୍ରମୁଖ ଉପସ୍ଥିତ ଥିଲେ । ଏଥିରେ ବହୁ ବିଜେପି କର୍ମୀ ଉପସ୍ଥିତ ଥିଲେ ।
ରିପୋର୍ଟ : ଭୂପତି ପରିଡା