ପାରଳାଖେମୁଣ୍ଡି (ସମୃଦ୍ଧ ଓଡିଶା) ଗଜପତି ଜିଲ୍ଲା ଗୁମ୍ମା ସ୍ଥିତ ହାଟପଦା ପରିସରରେ ଆଜି “ବିଶ୍ୱ ଆଦିବାସୀ ଦିବସ” କାର୍ଯ୍ୟକ୍ରମ ବିଶ୍ୱ ଆଦିବାସୀ ଦିବସ ପାଳନ କମିଟି ପକ୍ଷରୁ ପାଳିତ ହୋଇଯାଇଛି । ଏହି ଅବସରରେ ଆଦିବାସୀ ମାନଙ୍କ ପକ୍ଷ’ରୁ ପାରମ୍ପରିକ ନାଚ ଓ ଗୀତ ସହ ସଭା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଅନୁଷ୍ଠିତ ଆଦିବାସୀ ସମ୍ମିଳନୀ କାର୍ଯ୍ୟକ୍ରମରେ ଗୁମ୍ମା ବ୍ଲକ୍ ଅଧ୍ୟକ୍ଷା ତଥା ପାଳନ କମିଟିର ଶ୍ରୀମତୀ ସୁନେମି ମଣ୍ଡଳ ଓ ରାୟଗଡା ଜିଲ୍ଲା କଲ୍ୟାଣପୁର ବ୍ଲକ ବିଡ଼ିଓ ଶ୍ରୀ ସୁଧାକର ରଇତ ଅତିଥି ଭାବେ ଯୋଗଦେଇ ଆଦିବାସୀ ମାନଙ୍କ ସାମର୍ଥ୍ୟ, ନମନିୟତା, ଆତ୍ମାଭିମାନ, ଶାନ୍ତି ଓ ଆଡମ୍ବର ଜୀବନଶୈଳୀ’କୁ ସ୍ଵୀକୃତି ଓ ସମ୍ମାନ ଦେବା ସହିତ ଏହାର ନିୟନ୍ତ୍ରଣ ତଥା ସୁରକ୍ଷା’ର ବିକାଶ ଓ ଏହାର ପ୍ରୟୋଗ’କୁ ସୁନିଶ୍ଚିତ କରିବା ଦିଗରେ ସଚେତନ ଆଣିବା ଏହି ଦିବସ ପାଳନର ଉଦ୍ଦେଶ୍ୟ ବୋଲି କହିଥିଲେ । ଅନ୍ୟମାନଙ୍କ ମଧ୍ୟରେ ଏହି କାର୍ଯ୍ୟକ୍ରମରେ ହାଇଟେକ୍ ମେଡିକାଲର ମେନେଜୀଙ୍ଗ ଡାଇରେକ୍ଟର ସୁରେଶ ପାଣିଗ୍ରାହୀ, ପ୍ରଫେସର ମାରୁତ୍ ପାଲ, ଗୁମ୍ମାବ୍ଲକ୍ ଉପାଧ୍ୟକ୍ଷ ଏସ ଶ୍ରୀନିବାସ ରାଓଙ୍କ ସମେତ ଜିଲ୍ଲା ପରିଷଦ ସଭ୍ୟ ଶ୍ରୀ ବାଲାରାଜୁ ପ୍ରମୁଖ ମଞ୍ଚାଷୀନ ଅତିଥି ଭାବେ ଯୋଗଦେଇ ଭାଷା ଓ ସଂସ୍କୃତି ହେଉଛି ଆଦିବାସୀ ମାନଙ୍କ ନିଜସ୍ଵ ପରିଚୟ, ଯେଉଁ ଜାତିର ଭାଷା ଓ ସଂସ୍କୃତି ଯେତେ ସ୍ୱଚ୍ଛ, ପରିମାର୍ଜିତ୍ ଓ ସମୃଦ୍ଧି, ସେ ଜାତି ସେତେ ଉନ୍ନତ-ସମୃଦ୍ଧ ବୋଲି କହିଥିଲେ l ଏହି ଅବସର’ରେ ଶୋଭାଯାତ୍ରା ଅନୁଷ୍ଠିତ ହେବା ସହ ଆଦିବାସୀ ମାନେ ପାରମ୍ପରିକ ଅସ୍ତ୍ରଶସ୍ତ୍ର ଧରି ନାଚ କରିବା ସହ ବିଶିଷ୍ଟ ଆଦିବାସୀ ସଙ୍ଗୀତ ଗାୟକ ଶ୍ରୀ ଷ୍ଟିଫେନ ରଇତ ଯୋଗଦେଇ ଆଦିବାସୀ ଗୀତ ପରିବେଷଣ କରିଥିଲେ । ଏହି କାର୍ଯ୍ୟକ୍ରମ ଅବସରରେ ଉଲ୍ଲେଖନୀୟ ସେବାକାର୍ଯ୍ୟ କରି ଆସୁଥିବା ଆଦିବାସୀ ଲୋକ ପ୍ରତିନିଧି ମାନଙ୍କୁ ସମ୍ମାନିତ କରାଯାଇଥିଲା ।
ରିପୋର୍ଟ : କୃଷ୍ଣ କୁମାର ବେହେରା