ଢେଙ୍କାନାଳ (ସମୃଦ୍ଧ ଓଡିଶା) ସ୍ଥାନୀୟ ସୁଲକ୍ଷଣା ଦେବୀ ସରକାରୀ ଉଚ୍ଚ ବିଦ୍ୟାଳୟ, ଢେଙ୍କାନାଳ ସଭାଗୃହରେ କୋଭିଡ ନିୟମ ଅନୁପାଳନ କରି ଜିଲ୍ଲା ପ୍ରଶାସନ(ଶିକ୍ଷା ବିଭାଗ) ଆନୁକୂଲ୍ୟରେ ଜିଲ୍ଲାସ୍ତରୀୟ ମୋ ସ୍କୁଲ କାର୍ଯ୍ୟକ୍ରମ ଅନ୍ତର୍ଗତ ପ୍ରାକ୍ତନ ଛାତ୍ରୀଛାତ୍ରଙ୍କ ସମ୍ବର୍ଦ୍ଧନା ଓ ଓଡ଼ିଶାର ମୁଖ୍ୟମନ୍ତ୍ରୀଙ୍କ ଧନ୍ୟବାଦ ପତ୍ର ପ୍ରଦାନ ଉତ୍ସବ ଅନୁଷ୍ଠିତ ହୋଇଯାଇଛି । ଢେଙ୍କାନାଳ ଜିଲ୍ଲା ଶିକ୍ଷା ଅଧିକାରୀ ଶ୍ରୀମତୀ ନିବେଦିତା ପାଣିଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ ମୁଖ୍ୟଅତିଥି ଭାବରେ ଢେଙ୍କାନାଳର ଜିଲ୍ଲାପାଳ ଭୁମେଶ ଚନ୍ଦ୍ର ବେହେରା ଯୋଗଦାନ କରି ଅର୍ଥଦାନ, ଦ୍ରବ୍ୟଦାନ, ସେବାଦାନ, ସ୍ନେହ ଓ ଭଲ ପାଇବା ଦେଇ ମୋ ସ୍କୁଲ ଅଭିଯାନକୁ ସଫଳ କରିବାକୁ ଦୃଢ଼ ଆହ୍ୱାନ ଜଣାଇ ଥିଲେ । ସେ ଏହି ଅବସରରେ ସୁଲକ୍ଷଣା ଦେବୀ ସରକାରୀ ଉଚ୍ଚ ବିଦ୍ୟାଳୟ,ଢେଙ୍କାନାଳକୁ ନିଜର ପୋଷ୍ୟ ବିଦ୍ୟାଳୟ ରୂପେ ଘୋଷଣା କରିଥିଲେ । ସମ୍ମାନିତ ଅତିଥି ଭାବରେ ଢେଙ୍କାନାଳ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ଅଧିକାରୀ ନରୋତ୍ତମ ବେହେରା ସ୍ଵୀୟ ଅଭିଭାଷଣରେ ପୁରାତନ ଛାତ୍ରୀ ଛାତ୍ରଙ୍କର ବଦାନ୍ୟତା ମୋ ସ୍କୁଲ ଅଭିଯାନକୁ ସଫଳତାର ଶୀର୍ଷରେ ପହଞ୍ଚାଇ ପାରିବ ବୋଲି ଦୃଢ଼ ଆଶା ପୋଷଣ କରିଥିଲେ । ଢେଙ୍କାନାଳ ଜିଲ୍ଲା ଶିକ୍ଷା ଅଧିକାରୀ ଶ୍ରୀମତୀ ନିବେଦିତା ପାଣି ସ୍ଵୀୟ ଅଭିଭାଷଣରେ ସମସ୍ତେ ଓଡ଼ିଶା ସରକାରଙ୍କ ଏହି ଅଭିନବ ମୋ ସ୍କୁଲ ଯୋଜନାରେ ଅର୍ଥ ରାଶି ପ୍ରଦାନ କରି ସରକାରଙ୍କ ଦ୍ୱାରା ପ୍ରଦତ୍ତ ଏହାର ଦୁଇଗୁଣ ଅର୍ଥରାଶି ପ୍ରାପ୍ତ ହୋଇ ସମୁଦାୟ ଅନୁଦାନ ଅର୍ଥରାଶିର ତିନି ଗୁଣ ଅର୍ଥରାଶିର ସୁବର୍ଣ୍ଣ ସୁଯୋଗର ସୁବିନିଯୋଗ କରି ବିଦ୍ୟାଳୟର ସର୍ବାଙ୍ଗୀନ ବିକାଶରେ ସହାୟକ ହେବାକୁ ଆହ୍ୱାନ ଜଣାଇଥିଲେ । ସୁଲକ୍ଷଣା ଦେବୀ ସରକାରୀ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ତଥା ଗଁଦିଆ ବ୍ଲକ ଶିକ୍ଷା ଅଧିକାରୀ ମିନତି ଦେହୁରୀଙ୍କ ସମେତ ଅନେକ ବକ୍ତା ସ୍ବ ସ୍ବ ଅଭିଭାଷଣରେ ମୋ ସ୍କୁଲ ଅଭିଯାନର ପାଣ୍ଠି ସଂଗ୍ରହ ଓ ବିଦ୍ୟାଳୟର ସର୍ବାଙ୍ଗୀନ ଉନ୍ନତି କଳ୍ପେ ଏହାର ସୁବିନିଯୋଗ ପାଇଁ ବିଭିନ୍ନ ପ୍ରକଳ୍ପ କାର୍ଯ୍ୟର ପ୍ରସ୍ତାବ ଗୁଡିକର ଉପସ୍ଥାପନ କରିବା ସଙ୍ଗେ ସଙ୍ଗେ ସମସ୍ତେ ଏକ ମନ ଏକ ପ୍ରାଣରେ ମୋ ସ୍କୁଲ କାର୍ଯ୍ୟକ୍ରମର ସଫଳ ରୂପାୟନରେ ପ୍ରମୁଖ ଭୂମିକା ନିର୍ବାହ କରିବାକୁ ଦୃଢ଼ ଆହ୍ୱାନ ଦେଇଥିଲେ । ଜିଲ୍ଲାର ବିଭିନ୍ନ ବିଦ୍ୟାଳୟର ବିଭିନ୍ନ ବର୍ଷର ବିଭିନ୍ନ ବ୍ଲକରୁ ଆସିଥିବା ପ୍ରାକ୍ତନ ଛାତ୍ରୀ,ଛାତ୍ରମାନଙ୍କ ମଧ୍ୟରେ ଶତାୟୁ ବ୍ରଜନାଥ ବଡ଼ଜେନା ଉଚ୍ଚ ବିଦ୍ୟାଳୟର ପ୍ରାକ୍ତନ ଛାତ୍ର, ବାପୁଜୀ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ପୁରାତନ ଛାତ୍ର ତଥା ଆଲୁମିନି ଆସୋସିଏସନର ସଭାପତି, ପ୍ରକୃତି ପ୍ରେମୀ ତଥା ସମାଜସେବୀ ଆଇନଜୀବୀ ଗୁପ୍ତେଶ୍ଵର ମିଶ୍ର ଅନ୍ୟତମ ବକ୍ତା ଭାବରେ ସ୍ଵୀୟ ଅଭିଭାଷଣରେ ମୋ ସ୍କୁଲ ଯୋଜନା ମାଧ୍ୟମରେ ସେ କିପରି ନିଜ ପ୍ରିୟ ବିଦ୍ୟାଳୟର ସର୍ବାଙ୍ଗୀନ ଉନ୍ନତି କରିପାରିଛନ୍ତି ଓ ଆଗାମୀ ଦିନରେ ଆହୁରି ଅଧିକ କାର୍ଯ୍ୟକ୍ରମ ହାତକୁ ନେବାକୁ ଯୋଜନା ରଖିଛନ୍ତି ସେ ସମ୍ପର୍କରେ ସଂକ୍ଷିପ୍ତ ଅଭିଭାଷଣ ପ୍ରଦାନ କରିଥିଲେ । ସାରଙ୍ଗାଧର ଉଚ୍ଚ ବିଦ୍ୟାଳୟର ପ୍ରାକ୍ତନ ଛାତ୍ର ସତ୍ୟାନନ୍ଦ ମଲ୍ଲିକ ମି ସ୍କୁଲ ଅଭିଯାନକୁ ସଫଳ କରିବାରେ ସ୍ଵ ଅନୁଭୂତି ବର୍ଣନାକରି ଅନ୍ୟମାନଙ୍କୁ ଅନୁପ୍ରାଣିତ। କରିଥିଲେ ପ୍ରକୃତିପ୍ରେମୀ ଇଂ ଅଖିଳ ପଣ୍ଡା ପ୍ରତ୍ୟେକ ବିଦ୍ୟାଳୟକୁ ସବୁଜ ସୁନ୍ଦର କରିବାକୁ ଦୃଢ଼ ଆହ୍ୱାନ ଜଣାଇଥିଲେ । ପ୍ରାକ୍ତନ ଢେଙ୍କାନାଳ ନଗରପାଳ ଇନ୍ଦ୍ରମଣି ବେହେରା, ଢେଙ୍କାନାଳ ଗୋଷ୍ଠୀ ଶିକ୍ଷା ଅଧିକାରୀ ସୁଶ୍ରୀ ମୌସୁମୀ ସାହୁ, ମଙ୍ଗଳ ପୁର ସରକାରୀ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ତଥା ପ୍ରାକ୍ତନ ଜିଲ୍ଲା ବିଜ୍ଞାନ ସୁପରଭାଇଜର ସୁକାନ୍ତ ଚରଣ ସାହୁ,ବର୍ତ୍ତମାନର ଜିଲ୍ଲା ବିଜ୍ଞାନ ସୁପରଭାଇଜର ଅଶୋକ କୁମାର ପଣ୍ଡା ଓ ଢେଙ୍କାନାଳ ଜିଲ୍ଲା ଶିକ୍ଷା କାର୍ଯ୍ୟାଳୟର ସହଯୋଗୀ ବୃନ୍ଦ, ବାପୁଜୀ ଉଚ୍ଚ ପ୍ରାଥମିକ ବିଦ୍ୟାଳୟ, ଢେଙ୍କାନାଳର ପ୍ରାକ୍ତନ ଛାତ୍ର, କାଇମାଟି ଉଚ୍ଚ ବିଦ୍ୟାଳୟ, କାଇମାଟିର ଆଲୁମିନି ଆସୋସିଏସନର ସଭାପତି, ଶତାୟୁ, ବ୍ରଜନାଥ ବଡ଼ଜେନା ଉଚ୍ଚ ବିଦ୍ୟାଳୟ, ଢେଙ୍କାନାଳର ମୋ ସ୍କୁଲ ଦାୟିତ୍ବରେ ଥିବା ଶିକ୍ଷକ ତଥା ଢେଙ୍କାନାଳ ଜିଲ୍ଲା ମୋ ସ୍କୁଲ କ୍ୟାମ୍ପେନ ଟିମର ଦଳ ମୁଖ୍ୟ ଡା.ଦେବୀ ପ୍ରସାଦ ମିଶ୍ର, ମୋ ସ୍କୁଲ ଯୋଜନାରେ ପ୍ରମୁଖ ଭୂମିକା ନିର୍ବାହ କରୁଥିବା ଶିକ୍ଷକ ଶିକ୍ଷିକା, କର୍ମଚାରୀ ବୃନ୍ଦ,ମୋ ଢେଙ୍କାନାଳ ଡିଜିଟାଲ ମିଡ଼ିଆର ବିଜ୍ଞାନ ମହାନ୍ତି, ଇଂ ସୌମ୍ୟବ୍ରତ ସାହୁଙ୍କ ସମେତ ଉପସ୍ଥିତ ସାମ୍ବାଦିକ ବନ୍ଧୁଗଣ ବିଦ୍ୟାଳୟର ସମସ୍ତ ଶିକ୍ଷକ, ଶିକ୍ଷୟିତ୍ରୀ, କର୍ମଚାରୀ ବୃନ୍ଦ ଓ ଅନେକ ଶୁଭେଛୁ ଉପସ୍ଥିତ ରହି କାର୍ଯ୍ୟକ୍ରମରେ ସକ୍ରିୟ ଅଂଶଗ୍ରହଣ କରି କାର୍ଯ୍ୟକ୍ରମକୁ ସଫଳ କରିଥିଲେ । ସଭା ପ୍ରାରମ୍ଭରେ ମଞ୍ଚାସୀନ ଅତିଥିମାନଙ୍କ ଦ୍ୱାରା ଜଗନ୍ନାଥଙ୍କ ଫୋଟୋ ଚିତ୍ରରେ ପୁଷ୍ପମାଲ୍ୟାର୍ପଣ, ପଞ୍ଚାୟତ ରାଜ ଉଚ୍ଚ ବିଦ୍ୟାଳୟର ସଙ୍ଗୀତ ଶିକ୍ଷକ ଅମିତ ନାୟକଙ୍କ ଦ୍ଵାରା ମଙ୍ଗଳାଚରଣ ଗାନ ଓ ତାଙ୍କର ନେତୃତ୍ୱରେ ସହଯୋଗୀ ଛାତ୍ରୀମାନଙ୍କ ଦ୍ୱାରା ଓଡ଼ିଶା ବିଦ୍ୟାଳୟ ଓ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବ ସତ୍ୟବ୍ରତ ସାହୁଙ୍କ ଦ୍ଵାରା ପୂର୍ବରୁ ଗାନ କରାଯାଇଥିବା ମୋ ସ୍କୁଲ ସମ୍ପର୍କିତ ମନଛୁଆଁ ସ୍ୱାଗତ ସଙ୍ଗୀତ ଗାନ ସଭାର ପରିବେଶକୁ ଆହୁରି ହୃଦୟସ୍ପର୍ଶୀ କରି ତୋଳିଥିଲା । ବିପିନ ବିହାରୀ ସାହୁ, କ୍ରୀଡା ଶିକ୍ଷକ ସଭା କାର୍ଯ୍ୟ ଅତ୍ୟନ୍ତ ସୁନ୍ଦର ଭାବରେ ସଂଯୋଜନା କରିଥିବାବେଳେ ମୁଖ୍ୟମନ୍ତ୍ରୀଙ୍କ ଧନ୍ୟବାଦ ପତ୍ର ତାଲିକା ପାଠ କରିଥିଲେ । ପରିଶେଷରେ ପଂଚାୟତିରାଜ ଉଚ୍ଚ ବିଦ୍ୟାଳୟ, କାନପୁରା, କାମାକ୍ଷାନଗରର ସହକାରୀ ଶିକ୍ଷକ ନିରଞ୍ଜନ ସାହୁ ସମସ୍ତଙ୍କୁ ଧନ୍ୟବାଦାର୍ପଣ କରିବା ପରେ ସଭା ସାଙ୍ଗ ହୋଇଥିଲା ।
