ଭୁବନେଶ୍ୱର (ସମୃଦ୍ଧ ଓଡ଼ିଶା) ପଶ୍ଚିମ ଓଡ଼ିଶାର ବିକାଶ ପାଇଁ ଗଠନ ହୋଇଥିବା ପଶ୍ଚିମ ଓଡ଼ିଶା ବିକାଶ ପରିଷଦର କର୍ମକର୍ତ୍ତା ତଥା ପରିଚାଳନା ସଦସ୍ୟ ମନନୟନକୁ ନେଇ ଏବେ ବିଜେଡି ରାଜନୀତିରେ ଉଷ୍ମତା ଦେଖା ଦେଇଛି । ପଶ୍ଚିମ ଓଡ଼ିଶା ବିକାଶ ପରିଷଦର ପରିଚାଳନା କମିଟିରେ ୨ଜଣ ସାଂସଦ ଓ ୧୧ଜଣ ବିଧାୟକଙ୍କୁ ସଦସ୍ୟ ଭାବେ ସାମିଲ କରାଯିବାର ଆବଶ୍ୟକତା ଥିବାରୁ ବିଜେଡି କେଉଁମାନଙ୍କୁ ସେଥିରେ ସାମିଲ କରିବ ତାକୁ ନେଇ ଦଳୀୟ ନେତାମାନଙ୍କ ମଧ୍ୟରେ ଛକାପଞ୍ଝା ଆରମ୍ଭ ହୋଇଯାଇଥିବା ଜଣାପଡ଼ିଛି । ସୂଚନା ଅନୁଯାଇ ଷୋଡ଼ଶ ଲୋକସଭା ଓ ପଞ୍ଚଦଶ ବିଧାନସଭାର କାର୍ଯ୍ୟକାଳ ଶେଷ ହୋଇ ସାରିଥିବାରୁ ନିୟମ ଅନୁସାରେ ପଶ୍ଚିମ ଓଡ଼ିଶା ବିକାଶ ପରିଷଦରେ ପୁଣି ଥରେ ୨ଜଣ ସାଂସଦ ଓ ୧୧ଜଣ ବିଧାୟକଙ୍କୁ ପରିଚାଳନା କମିଟି ସଦସ୍ୟ ଭାବେ ସାମିଲ କରାଯିବ। ନିୟମ ରହିଛି । ୨୦୨୦-୨୧ ଆର୍ଥିକ ବର୍ଷର ରାଜ୍ୟ ବଜେଟ୍ ଫେବୃୟାରୀ ୧୮ତାରିଖରେ ଉପସ୍ଥାପନ ହେବାର ଥିବାବେଳେ ଏହା ପୂର୍ବରୁ ପଶ୍ଚିମ ଓଡ଼ିଶା ବିକାଶ ପରିଷଦର ପରିଚାଳନା କମିଟିରେ ପରିଷଦର ବଜେଟକୁ ଅନୁମୋଦନ ମିଳିବା ନିହାତି ଆବଶ୍ୟକ । ତେଣୁ ଅଧ୍ୟକ୍ଷଙ୍କୁ ମିଶାଇ ମୋଟ୍ ୨୬ଜଣିଆ ପରିଷଦ ଆଇନ-୨୦୦୦ର ଧାରା ୧୧(୧)(ଏଫ) ଅନୁସାରେ ପରିଷଦର ନିଜସ୍ୱ ବଜେଟ୍ ପ୍ରସ୍ତୁତ କରିବା ଦରକାର । ଯାହାକି ରାଜ୍ୟ ସରକାରଙ୍କ ପାଖରେ ରାଜ୍ୟ ବଜେଟ୍ ପୂର୍ବରୁ ଦାଖଲ କରିବାର ଆବଶ୍ୟକତା ରହିଛି । ତେଣୁ ପରିଷଦର ପରିଚାଳନା କମିଟି ସଦସ୍ୟ ଚୟନ କାର୍ଯ୍ୟ ବଜେଟ୍ ଅଧିବେଶନ ପୂର୍ବରୁ ହେବା ଜରୁରୀ ହୋଇପଡ଼ିଛି । ଅନ୍ୟପକ୍ଷରେ ପରିଷଦ ଅଧିନରେ ବରଗଡ଼, ବଲାଙ୍ଗୀର, ବୌଦ, ଦେବଗଡ଼, ଝାରସୁଗୁଡ଼ା, କଳାହାଣ୍ଡି, ନୂଆପଡ଼ା, ସୁନ୍ଦରଗଡ଼, ସମ୍ବଲପୁର, ସୁବର୍ଣ୍ଣପୁର ଜିଲ୍ଲା ସମେତ ଆଠମଲ୍ଲିକ ସବଡିଭିଜନ ରହିଛି । ଏହି ଅଞ୍ଚଳରେ ମୋଟ ୫ଟି ଲୋକସଭା ମଣ୍ଡଳୀ ଓ ୩୬ଟି ବିଧାନସଭା ମଣ୍ଡଳୀ ଥିବାବେଳେ ମନ୍ତ୍ରୀ ସୁଶାନ୍ତ ସିଂ ଓ ମନ୍ତ୍ରୀ ନବ କିଶୋର ଦାସଙ୍କ ମଧ୍ୟରେ ଏଥିପାଇଁ ଶୀତଳ ଯୁଦ୍ଧ ଆରମ୍ଭ ହୋଇଯାଇଥିବା ଶୁଣିବାକୁ ମିଳୁଛି । ପରିଷଦର ବଜେଟ୍ ମୋଟ ୧୦୦ କୋଟି ଟଙ୍କା ହୋଇଥିବାରୁ ନେତାମାନେ ନିଜ ନିଜର ପତିଆରା ଦେଖାଇବାକୁ ଉଦ୍ୟମ କରିଥାନ୍ତି । କଳାହାଣ୍ଡି, ସମ୍ବଲପୁର, ବଲାଙ୍ଗିର, ସୁନ୍ଦରଗଡ଼ ଓ ବରଗଡ଼ ଭଳି ଲୋକସଭା ଆସନଗୁଡ଼ିକ ଏବେ ବିଜେପି କବଜାରେ ଥିବାରୁ ପରିଷଦ ସଦସ୍ୟ ଚୟନ କରିବାରେ ବିଜେଡିକୁ ଅଡୁଆରେ ସମୁଖୀନ ହେବାକୁ ପଡିପାରେ ବୋଲି କୁହାଯାଉଛି । ତେବେ ବଜେଟ ଶହେ କୋଟି ଟଙ୍କାକୁ ନେଇ ସମସ୍ତଙ୍କ ନଜର ।
