ଜଳେଶ୍ୱର (ସମୃଦ୍ଧ ଓଡିଶା) ବାଲେଶ୍ୱର ଜିଲାରେ ଜଳେଶ୍ୱର ବ୍ଳକ ଅନ୍ତର୍ଗତ ନାମ୍ପୋ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ବହୁ ବର୍ଷରୁ ସ୍ଥାୟୀ ଡାକ୍ତର ନଥିବାରୁ ପୂର୍ବ ସୂଚନା ଅନୁଯାୟୀ ଆଜି ଗ୍ରାମବାସୀଙ୍କ ପକ୍ଷରୁ ଆମରଣ ଅନସନ ଆରମ୍ଭ ହୋଇଛି । ଏହି ସ୍ୱାସ୍ଥ୍ୟ କେନ୍ଦ୍ର ଦ୍ୱାରା ଖାଲିନା, ସମ୍ପତ୍ତିଆ, ନେତୁଆ, ସୁଗୋ, ବର୍ତ୍ତନା, ବାଇଗଣବାଡିଆ ଆଦି ପଞ୍ଚାୟତର ଲୋକେ ଚିକିତ୍ସିତ ହୋଇଥାନ୍ତି । ଦୀର୍ଘ ୧୫ବର୍ଷ ଧରି ଏଠାରେ କେହି ସ୍ଥାୟୀ ଡାକ୍ତର ନ ଥିବା ବେଳେ ଜନସାଧାରଣ ସ୍ୱାସ୍ଥ୍ୟସେବା ଲାଗି ଡହଳ ବିକଳ ହୋଇଥାନ୍ତି । ଏ ସମ୍ପର୍କରେ ପୂର୍ବରୁ ବହୁ ସଂଗଠନ ଓ ରାଜନୈତିକ ଦଳ ଡାକ୍ତର ନିଯୁକ୍ତି ସଂପର୍କରେ ଉଚ୍ଚ କର୍ମକର୍ତ୍ତାଙ୍କ ଦୃଷ୍ଟି ଆକର୍ଷଣ କରି ଆସୁଛନ୍ତି । କୌଣସି କାର୍ଯ୍ୟାନୁଷ୍ଠାନ ନ ହେବାରୁ ଆଂଚଳିକ ଅବସରପ୍ରାପ୍ତ କର୍ମଚାରୀ ସଂଘ ଓ ବିଜେପିର ନାମ୍ପୋ ଶାଖା ପକ୍ଷରୁ ଆଜି ପୂର୍ବାହ୍ନରୁ ଆମରଣ ଅନଶନ ଆରମ୍ଭ ହୋଇଛି । ଦାବି ପୁରଣ ନ ହେବା ପର୍ଯ୍ୟନ୍ତ ଏହା ଚାଲିବ ବୋଲି ସୂଚନା ଦେଇଛନ୍ତି । ଏହି ଆନ୍ଦୋଳନରେ ଗୋପାଳ ଦତ୍ତ, ସୁମତି ଦେ, ଜଗନ୍ନାଥ ପ୍ରଧାନ, ପ୍ରତାପ ସେନାପତି, ସୋରୂପ ସିଂହ, ହରିଶଚନ୍ଦ୍ର ହୁଇ, ସୁଧିର ଭୂୟାଁ, ଜ୍ୟୋତିବ୍ରହ୍ମ ଦେ, ଜନ୍ମେଜୟ ଚନ୍ଦ, ବିନୟ ଭୂୟାଁ, ଅକ୍ଷୟ ଜେନା, ଦିଲ୍ଲିପ ଦାସ ପ୍ରମୁଖ ଯୋଗ ଦେଇଛନ୍ତି । ଅପରାହ୍ନରେ ହାତୀଗଡ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଡାକ୍ତର ପ୍ରଭାସଚନ୍ଦ୍ର ନାୟକ ଓ ଜିଲା ମୁଖ୍ୟ ଚିକିତ୍ସାଧିକାରୀଙ୍କ ପ୍ରତିନିଧି ରଂଜନ ନାୟକ ଘଟଣାସ୍ଥଳରେ ପହଞ୍ଚି ସପ୍ତାହକୁ ୨ଦିନ ଜଣେ ଡାକ୍ତରଙ୍କୁ ପଠାଇବା ଓ ୧ମାସ ପରେ ସ୍ଥାନୟୀ ଡାକ୍ତରର ପ୍ରତିଶ୍ରୁତି ଦେଇଥିଲେ ମଧ୍ୟ ଆନ୍ଦୋଳନକାରୀମାନେ ସ୍ଥାୟୀ ନିଯୁକ୍ତିି ଦିବାରେ ଅଡି ବସିଛନ୍ତି । ଖବର ଲେଖା ହେବା ପର୍ଯ୍ୟନ୍ତ ଆନ୍ଦୋଳନ ଚାଲୁରହିଥିବା ଜଣାଯାଇଛି । ପ୍ରକାଶଯୋଗ୍ୟ ଖୁଆଡ, ଓଲମରା, ନାମ୍ପୋ, ଛମୌଜ, ଜମାଳପୁରରେ, ଲକ୍ଷ୍ମଣନାଥ, ଶିଖରପୁର ଓ ଜଳେଶ୍ୱର ପୁରୁଣା ଡାକ୍ତରଖାନାରେ ଡାକ୍ତର ନାହାନ୍ତି ।
ରିପୋର୍ଟ : ଭୂପତି ପରିଡା